পুনৰ চৰকাৰী বিদ্যালয় বন্ধৰ নিৰ্দেশঃ ৰাজ্যৰ ৯৬ খন বিদ্যালয় বন্ধৰ সিদ্ধান্ত প্ৰত্যাহাৰৰ দাবী আপৰ সভাপতি ভবেন চৌধুৰীৰ

চৰকাৰী শিক্ষানুষ্ঠান বন্ধ কৰি বিজেপি চৰকাৰে শিক্ষাৰ বাণিজ্যিকিকৰণ কৰিব বিচাৰিছে

গুৱাহাটীঃ ‘যি সময়ত ৰাজ্যৰ একাংশ শিক্ষানুষ্ঠানৰ আন্তঃগাঁথনি নিৰ্মানৰ নামত সমগ্ৰ শিক্ষা অভিযানে শ শ কোটি টকা ব্যয় কৰিছে, সেই সময়তে জনসাধাৰণৰ স্বাৰ্থৰ বিপৰীতে গৈ অসম চৰকাৰে বিভিন্ন অজুহাতত হাজাৰ হাজাৰ চৰকাৰী বিদ্যালয় বন্ধ কৰাৰ নিৰ্দেশ জাৰি কৰিছে। চৰকাৰী বিদ্যালয়ত নামভৰ্তিৰ হাৰ বৃদ্ধি কৰাৰ পৰিবৰ্তে শিক্ষা বিভাগে বিদ্যালয় বন্ধ কৰি দিয়াৰ টোগলকী কাণ্ড সংঘটিত কৰিছে।’ আজি মহানগৰীৰ গণেশগুৰিস্থিত আম আদমী পাৰ্টিৰ কাৰ্যালয়ত দলৰ ৰাজ্যিক সভাপতি ডাঃ ভবেন চৌধুৰীয়ে এক সংবাদমেলত ৰাজ্য চৰকাৰৰ বিৰুদ্ধে এইদৰে সৰৱ হয়। মুখ্যমন্ত্ৰী ড° হিমন্ত বিশ্ব শৰ্মা, শিক্ষামন্ত্ৰী ডাঃ ৰণোজ পেগুৰ লগতে

ৰাজ্যৰ শিক্ষা বিভাগে চৰকাৰী শিক্ষা ব্যৱস্থা ধ্বংসৰ গৰাহলৈ ঠেলি দিয়া বুলি অভিযোগ উত্থাপন কৰে আপ, অসমৰ সভাপতি গৰাকীয়ে৷ ডাঃ চৌধুৰীয়ে কয়, “অসমবাসীৰ স্বাৰ্থ জলাঞ্জলি দি মুখ্যমন্ত্ৰী ড° হিমন্ত বিশ্ব শৰ্মাৰ চৰকাৰে পুনৰ ৯৬ খন বিদ্যালয় বন্ধ কৰাৰ নিৰ্দেশ জাৰি কৰিছে। এই বিদ্যালয় সমূহৰ ভিতৰত ৭৯ খন হাইস্কুল, ১৭ খন চিনিয়ৰ ছেকণ্ডেৰি স্কুল আছে। ৰাজ্যবাসীৰ কোনো কথা কৰ্ণপাত নকৰা বিজেপি চৰকাৰৰ শিক্ষা বিভাগে পূৰ্বেও ৮০৬৬ খন বিদ্যালয় বন্ধ কৰিছিল। আন্তঃগাঁথনিৰ অভাৱ অথবা পৰ্যাপ্ত শিক্ষাৰ্থী নথকাৰ অজুহাতত এনেদৰে বিদ্যালয় সমূহ বন্ধ কৰি ব্যক্তিগত খণ্ডৰ শিক্ষা প্ৰতিষ্ঠানক উৎসাহিত কৰিছে। স্বয়ং

মুখ্যমন্ত্ৰী ড° হিমন্ত বিশ্ব শৰ্মাৰ পৰিয়ালেই ব্যক্তিগত খণ্ডৰ বিদ্যালয় আৰম্ভ কৰিছে। সংবাদমেলত ডাঃ ভবেন চৌধুৰীৰ অভিযোগ, চৰকাৰে নতুনকৈ কোনো বিদ্যালয় প্ৰাদেশিকীকৰণ কৰিব পৰা নাই। ভেঞ্চাৰ স্কুলৰ শিক্ষক সকলৰ আন্দোলনৰ প্ৰতি চৰকাৰৰ সহাঁৰি নাই। অথচ মাথোঁ ব্যক্তিগত খণ্ডৰ বিদ্যালয়ৰ স্বাৰ্থতে ৰাইজে স্থাপন কৰা চৰকাৰী খণ্ডৰ স্কুলবোৰত তলা লগাইছে চৰকাৰে। ৰাজ্যৰ মাধ্যমিক শিক্ষা সঞ্চালকে বিদ্যালয় সমূহৰ পৰিদৰ্শক সকললৈ প্ৰেৰণ কৰা নিৰ্দেশ অনুসৰি এইবাৰ ধেমাজি জিলাৰ সৰ্বাধিক ২১ খন হাইস্কুল আৰু চিনিয়ৰ ছেকেণ্ডাৰী স্কুল বন্ধৰ নিৰ্দেশ দিছে চৰকাৰে। আনহাতে, কামৰূপ জিলাত ১০ খন, বঙাইগাঁও জিলাত ৯ খন, ধুবুৰী

জিলাৰ ৭খন, যোৰহাট আৰু শিৱসাগৰ জিলাত ৪ খনকৈ, গোৱালপাৰা, মৰিগাঁও, দক্ষিণ শালমাৰাত ৩ খনকৈ, হাইলাকান্দি, নগাঁও, তিনিচুকীয়া, কৰিমগঞ্জ, শোণিতপুৰ আৰু কাৰ্বি আংলং জিলাত ১ খনকৈ বিদ্যালয় বন্ধ কৰাৰ নিৰ্দেশ দিছে চৰকাৰে। ২০১৭ চনৰ প্ৰাদেশিকীকৰণ আইনৰ অধীনত প্ৰাদেশিকীকৃত বিদ্যালয় সমূহো অসম চৰকাৰে বন্ধ কৰিবলৈ নিৰ্দেশ দিছে। এয়া ড° হিমন্ত বিশ্ব শৰ্মা চৰকাৰৰ টোগলকী নীতিৰ বাহিৰে আন একো নহয়। বিগত দিনবোৰত আম আদমী পাৰ্টি, অসমে ৰাজ্যখনৰ চৰকাৰী খণ্ডৰ শিক্ষানুষ্ঠানসমূহৰ আন্তঃগাঁথনিৰ লগতে শিক্ষাৰ গুণগত মান উন্নত কৰাৰ দাবী উত্থাপন কৰি আহিছে যদিও চৰকাৰে গুৰুত্ব দিয়া

নাই৷ এসময়ত চৰকাৰী খণ্ডৰ বিদ্যালয়সমূহৰ যোগেদিয়েই ৰাজ্যখনৰ প্ৰায় সমগ্ৰ শিক্ষা ব্যৱস্থাটোৱে পৰিচালিত হৈছিল৷ অসম শৈক্ষিক মান সৰ্বভাৰতীয় স্তৰৰ লগতে আন আন ৰাজ্যসমূহতকৈ বহু পিছ পৰি আছে৷ শিক্ষাৰ্থীৰ সংখ্যা আৰু ফলাফলৰ আধাৰত অসম চৰকাৰে এখনৰ পাছত আনখনকৈ চৰকাৰী শিক্ষানুষ্ঠান একত্রীকৰণৰ নামত বন্ধ কৰিছে । ইতিমধ্যে ৰাজ্যৰ ৮০৬৬ খন চৰকাৰী খণ্ডৰ বিদ্যালয় বন্ধ কৰাৰ সমান্তৰালকৈ আন বহু বিদ্যালয় বন্ধ কৰাৰ প্ৰক্ৰিয়া অব্যাহত ৰাখিছে শিক্ষা বিভাগে৷ উল্লেখ্য যে বহুতো লোকৰ বহু অৱদানৰ ভিত্তিত গঢ় লৈ উঠা মাতৃভাষাৰ চৰকাৰী বিদ্যালয়সমূহৰ আঁৰত একো একোখন সমাজৰ ইতিহাস জড়িত হৈ

আছে৷ ৰাইজৰ আবেগ-অনুভূতি জড়িত হৈ থকা এই বিদ্যালয়সমূহ বন্ধ কৰাকলৈ ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছে।এইখিনিতে প্ৰশ্ন উত্থাপন হৈছে যে এসময়ত চৰকাৰী খণ্ডৰ এই বিদ্যালয়সমূহৰ জৰিয়তেই ৰাজ্যখনৰ প্ৰায় সমগ্ৰ শিক্ষা ব্যৱস্থাটোৱে পৰিচালিত হৈছিল৷ কেতিয়াও শিক্ষাৰ্থীৰ অভাৱ হোৱা নাছিল তথা ফলাফলক লৈ আজিৰ দৰে প্ৰশ্ন উত্থাপন হোৱা নাছিল। তেনেস্থলত সেই বিদ্যালয়সমূহত এতিয়া কিয় শিক্ষাৰ্থীৰ সংখ্যা কমি অহাৰ লগতে ফলাফলৰ মান অৱনমিত হৈছে৷ কিয় অভিভাৱকে পৰাপক্ষত নিজৰ সন্তানক চৰকাৰী বিদ্যালয়লৈ প্ৰেৰণ কৰিব নিবিচাৰে। এই সন্দৰ্ভত কিন্তু চৰকাৰীভাৱে কোনো ধৰণৰ অধ্যয়ন কৰা হোৱা নাই৷

আনহাতে, এইবিষয়ত চৰকাৰী পক্ষ সম্পূৰ্ণ নিমাত। ইয়াৰ বিপৰীতে চৰকাৰে শিক্ষাৰ্থীৰ সংখ্যা কম আৰু ফলাফল বেয়াক লৈ বিদ্যালয় বন্ধ কৰাৰ দিশতহে অধিক মনোনিৱেশ কৰিছে । লগতে চৰকাৰে শিক্ষাৰ সংস্কাৰৰ নামত বিতৰ্কৰ সূত্রপাত ঘটোৱা বিভিন্ন পদক্ষেপ গ্ৰহণ কৰি আহিছে । ৰাজ্যৰ বিভিন্ন দল-সংগঠনে চৰকাৰী খণ্ডৰ শিক্ষানুষ্ঠানসমূহৰ আন্তঃগাঁথনি উন্নত কৰাৰ লগতে শিক্ষাৰ গুণগত মান উন্নত কৰাৰ দাবী উত্থাপন কৰি আহিছে যদিও চৰকাৰে কোনো ধৰণৰ গুৰুত্ব আৰোপ কৰা নাই৷ লক্ষণীয় বিষয় যে ব্যৱস্থা এটাক মূল্যাংকন কৰিবলৈ কিছুমান নিৰ্দিষ্ট সূচকাংক নিৰ্ধাৰণ কৰা হয়৷ এই সূচকাংক সমূহৰ ওপৰত নিৰ্ভৰ কৰিহে ব্যৱস্থাটোৰ মান

নিৰূপণ কৰা হয়। অসমৰ শিক্ষা ব্যৱস্থাটোৰ মান ইয়াৰ সূচকাংকৰ পৰা সহজতে অনুমান কৰিব পাৰি৷ আন্তঃগাঁথনি বুলিলে বিদ্যালয় এখনৰ লগত জড়িত বহু দিশ সামৰি লোৱা হয়৷ বিদ্যালয়খনত থকা হাত ধোৱাৰ ব্যৱস্থা, বিদ্যুতৰ সংযোগ,ল’ৰা-ছোৱালীৰ বাবে পৃথক শৌচালয়, বিদ্যালয়ৰ ভিতৰতে থকা খোৱাপানীৰ ব্যৱস্থা, বিশেষভাৱে সক্ষম ছাত্ৰ-ছাত্ৰীৰ বাবে শৌচালয়ৰ ব্যৱস্থা, ৰেম্প, পুথিভঁৰাল, কম্পিউটাৰ আৰু ইণ্টাৰনেট, খেলপথাৰ আদি বিভিন্ন দিশ সাঙুৰি আন্তঃগাঁথনিমূলক ব্যৱস্থাত এইকেইটা দিশকে চালিজাৰি চোৱা হয়৷ অসমৰ চৰকাৰী খণ্ডৰ বিদ্যালয়সমূহ উক্ত সকলো কেইটা দিশকেই অতি পিছপৰা৷ ইয়াৰ মান সৰ্বভাৰতীয় স্তৰৰ লগতে আন

আন ৰাজ্যসমূহতকৈ বহু পিছ পৰি আছে৷ তথ্য মতে অসমৰ চৰকাৰী বিদ্যালয় সমূহত সুচল অৱস্থাত থকা বিদ্যুৎ সংযোগৰ হাৰ হ’ল ৫৭.৬২ শতাংশ। সৰ্বভাৰতীয় স্তৰত এই হাৰ ৮৩.৯২ শতাংশ। সেইদৰে বিদ্যালয় চৌহদতে খোৱাপানীৰ ব্যৱস্থা থকা বিদ্যালয়ৰ হাৰ হ’ল ৮৯.৬১ শতাংশ আৰু সৰ্বভাৰতীয় হাৰ ৯৫.১৭ শতাংশ। বিদ্যালয় চৌহদত ল’ৰাৰ বাবে থকা সুচল শৌচালয়ৰ হাৰ হ’ল ৭৬.৬৫ শতাংশ আৰু সৰ্বভাৰতীয় হাৰ ৯২.১৭ শতাংশ৷ বিদ্যালয়ত সুচল অৱস্থাত থকা কম্পিউটাৰৰ হাৰ ১৫.৭৩ শতাংশ আৰু সৰ্বভাৰতীয় হাৰ ৩২.৫৪ শতাংশ । ইণ্টাৰনেটৰ সংযোগ থকা বিদ্যালয়ৰ হাৰ ৪.৮৩ শতাংশ আৰু সৰ্বভাৰতীয় হাৰ ১৩.৬৪ শতাংশ । এইকেইটা

আছিল ৰাজ্যখনৰ বিদ্যালয় সমূহৰ শোচনীয় আন্তঃগাঁঠনিৰ এক চৰকাৰী তথ্য। আনহাতে, আন্তঃগাঁথনিৰ ক্ষেত্রত সূচকাংক হিচাপত নামভৰ্ত্তিৰ অনুপাত প্ৰাথমিক স্তৰত ইয়াৰ সৰ্বভাৰতীয় অনুপাত ১০৩.০৩, অসমত ১১৯.০১। উচ্চতৰ মাধ্যমিক শাখাত সৰ্বভাৰতীয় স্তৰত অনুপাত ৫৩.০৮, অসমত ৩২.০৩৷ লিংগ সমানুপাত প্ৰাথমিক স্তৰত সৰ্বভাৰতীয় অনুপাত ১.০২, অসমত ১.০৫ । আনহাতে, উচ্চতৰ মাধ্যমিকত সৰ্বভাৰতীয় পৰ্যায়ত ১.০৩ আৰু অসমত ১.০৫ । ছাত্ৰ শিক্ষকৰ অনুপাত প্ৰাথমিক স্তৰত সৰ্বভাৰতীয় স্তৰত এই অনুপাত ২৬.০৩, অসমত ২১৷ উচ্চতৰ মাধ্যমিকত সৰ্বভাৰতীয় পৰ্যায়ত ২৬.০৩, অসমত ১৭ । উত্তীৰ্ণৰ হাৰ

প্ৰাথমিক স্তৰত সৰ্বভাৰতীয় উত্তীৰ্ণৰ হাৰ ৯৯.০১ শতাংশ আৰু অসমত ৯৬.০২ শতাংশ । উচ্চ মাধ্যমিকত সৰ্বভাৰতীয় পৰ্যায়ত ৮৫.০১ শতাংশ আৰু অসমত ৬৮.০৪ শতাংশ ।ইপিনে,আধাতে বিদ্যালয় ত্যাগ কৰাৰ হাৰ সৰ্বভাৰতীয় স্তৰত প্ৰাথমিক শাখাত ০.৮ শতাংশ হোৱাৰ বিপৰীতে অসমত ৩.০৩ শতাংশ । তদুপৰি উচ্চ মাধ্যমিক শাখাত ১৪.০৬ শতাংশ আৰু অসমত ৩১ শতাংশ। অসমৰ এই হাৰ দেশৰ ভিতৰতে সৰ্বাধিক৷ আনহাতে, অসমৰ ৬০ শতাংশ বিদ্যালয়ত নাই খোৱা পানী । তদুপৰি ৭০ শতাংশ বিদ্যালয়ত নাই খেলপথাৰ । একেদৰে ৮৪ শতাংশ বিদ্যালয়ত নাই পুথিভঁৰাল । তথ্য় মতে,৯৫ শতাংশ বিদ্যালয়ত নাই কম্পিউটাৰ । একেটা তথ্য় অনুসৰি ৮৭

শতাংশ বিদ্যালয়ৰ আন্তঃগাঁথনি ভাল নহয় । এটা শ্ৰেণী কোঠাত ১২০ তকৈও অধিক শিক্ষাৰ্থী,এটা কোঠাত ৩/৪ টা শ্ৰেণী ভাগ কৰি শিক্ষা প্ৰদান কৰা হৈ আছে ।প্ৰকৃততে ৰাজ্য চৰকাৰৰ চৰম অবহেলা আৰু সদিচ্ছাৰ অভাৱতে ক্ৰমাৎ জহি-খহি গৈছে ৰাজ্যৰ চৰকাৰী শিক্ষা খণ্ড । চৰকাৰী বিদ্যালয়ৰ জৰাজীৰ্ণ আন্তঃগাঁথনি আৰু শিক্ষাৰ গুণগত মান সময় সাপেক্ষে উন্নত নকৰাৰ পৰিপ্ৰেক্ষিততে শিক্ষাৰ্থীৰ সংখ্যা ক্ৰমাৎ কমি অহাৰ লগতে ফলাফল অবনমিত হৈছে । কিন্তু চৰকাৰখনে এইক্ষেত্রত অলপো গুৰুত্ব দিয়া পৰিলক্ষিত হোৱা নাই । বৰং চৰকাৰী খণ্ডৰ বিদ্যালয়সমূহ ক্ৰমাৎ বন্ধ কৰি এই খণ্ডটোকে নোহোৱা কৰিব বিচাৰিছে ।সমান্তৰালকৈ শিক্ষকসকলৰ সমস্যা

সমূহক লৈয়ো চৰকাৰ সম্পূৰ্ণ উদাসীন। আমি গভীৰ উদ্বেগেৰে লক্ষ্য কৰিছো যে মুখ্যমন্ত্ৰী ৰূপে অধিষ্ঠিত হোৱাৰ পাছত ড° হিমন্ত বিশ্ব শৰ্মাই অসমৰ শিক্ষা ব্যৱস্থাটো সম্পূৰ্ণৰূপে ধ্বংস কৰিছে। এনে অৱস্থাত আপে অসম চৰকাৰক দিল্লী চৰকাৰৰ শিক্ষানীতিৰ আৰ্হি অধ্যয়ন কৰি দিল্লীৰ আৰ্হি অসমতো ৰূপায়ন কৰিবলৈ চৰকাৰক আহ্বান জনায়।