গৌৰীসাগৰঃ শিৱসাগৰ জিলাৰ গৌৰীসাগৰ আৰক্ষী থানাৰ পৰা কিছু নিলগৰ গৌৰীসাগৰ উচ্চ মাধ্যমিক বিদ্যালয়ৰ সন্মূখত আজি সন্ধিয়া সংঘটিত এক পথ দুৰ্ঘটনাত যতীন বৰা(৩৯) নামৰ এজন শিক্ষকৰ মৃত্যু হয়।ঘটনাৰ বিৱৰণী মতে বলীয়াঘাট শংকৰদেৱ বিদ্যা মন্দিৰত শিক্ষকতা কৰা শিক্ষকগৰাকীয়ে সন্ধিয়া ঘটনাস্থলীৰ সমীপৰৰ এটা কোচিং চেন্টাৰৰ পৰা ক্লাচ কৰি ঘৰলৈ বুলি এ এছ ০৪ ডব্লিউ ৭০১৭ নম্বৰৰ নিজা স্কুটিখনৰে যাব লওতে ৩৭ নং ৰাষ্ট্ৰীয় ঘাইপথত এ এছ ০৪ আৰ ৬৫১৬ নম্বৰৰ এখন আপাচী মটৰ চাইকেলেৰে খুন্দা মাৰি দিয়াত গুৰুতৰভাৱে আহত হৈ পৰে। প্ৰত্যক্ষদৰ্শীৰ মতে মটৰ চাইকেলত অহা আৰোহী দুজন অতি দ্ৰুত বেগেৰে
আহিছিল। গৌৰীসাগৰ আৰক্ষীয়ে মটৰ চাইকেল আৰোহী দুই যুৱকক আটক কৰি নিজৰ জিম্মাত লয়। অন্যহাতে তৎক্ষনাত ঘটনাস্থলীত উপস্থিত হোৱা গৌৰীসাগৰ আৰক্ষীয়ে স্থানীয় ৰাইজৰ সহযোগত আহত শিক্ষকগৰাকীক উদ্ধাৰ কৰি শিৱসাগৰ অসামৰিক চিকিৎসালয়লৈ আনে যদিও চিকিৎসকে মৃত ঘোষনা কৰে।জানিব পৰা মতে মৃত শিক্ষকগৰাকীৰ ঘৰ কোঁৱৰপুৰ মৌজাৰ শান্তিপুৰ গাওঁ পঞ্চায়তৰ শ্ৰী শ্ৰী টকৌবাৰী সত্ৰৰ শিষ্য প্ৰয়াত গেৰজাই বৰাৰ একমাত্র পুত্ৰ আছিল। সৰুতে পিতৃ মাতৃক হেৰুৱা প্ৰয়াত শিক্ষকগৰাকী উক্ত সত্ৰ খনতে থাকি ডাঙৰ দীঘল হৈছিল। শিক্ষকতাৰ লগতে ভাওনা সংস্কৃতিৰ লগতো জড়িত শিক্ষকগৰাকী এগৰাকী
সুদক্ষ ভাওৰীয়াও আছিল। অন্যহাতে আজি ঘৰৰ পৰা কিছু নিলগৰ এটা নামঘৰত অনুষ্ঠিত ভাওনা নাটত শিক্ষকগৰাকীয়ে যমৰ ভাও লৈছিল। কিন্তু নিয়তিয়ে হঠাৎতে কাঢ়ি নিয়া শিক্ষকগৰাকীৰ মৃত্যুত সমগ্ৰ অঞ্চলটোত শোকৰ ছাঁ পৰিছে। শিক্ষকগৰাকীৰ মৃত্যুত কোৱঁৰপুৰ প্ৰেছ ক্লাৱ, বলীয়াঘাট শংকৰদেৱ বিদ্যা মন্দিৰ, নকটানি যুৱ সমাজ আদিকে ধৰি বিভিন্ন অনুষ্ঠান প্ৰতিষ্ঠানে শোক প্ৰকাশ কৰিছে।
