‘গগৈ-মগৈ’ বুলি সাম্প্ৰদায়িক মন্তব্য কৰা মন্ত্ৰী ৰঞ্জিত দাসক বিজেপিয়ে দলৰ পৰা বৰ্খাস্ত কৰকঃ আম আদমি পাৰ্টী

ৰিপুণ বৰাকো তৃণমূল কংগ্ৰেছৰ নেতৃত্বই সভাপতি পদৰ পৰা অপসাৰণৰ দাবী আপৰঃ ৰূপজ্যোতি কুৰ্মীয়ে পৱিত্ৰ হেংদাঙক কৰা অপমানক সংস্কৃতিৱান কোনেও সহজভাৱে মানি নলয়

গুৱাহাটীঃ আম আদমি পাৰ্টীয়ে কেতিয়াও সাম্প্ৰদায়িক ৰাজনীতি সহ্য নকৰে। কংগ্ৰেছৰ দিনৰে পৰা চলি অহা সাম্প্ৰদায়িক ৰাজনীতি বিজেপিৰ দিনত চৰম পৰ্যায়ত উপনীত হৈছে। ই দেশৰ বাবে বা ৰাজ্যখনৰ বাবে অতি অশুভ পৰম্পৰা। এই পৰম্পৰা আম আদমি পাৰ্টীয়ে কেতিয়াও চলি থাকিবলৈ নিদিয়ে। শেহতীয়াকৈ মন্ত্ৰী ৰঞ্জিত দাসে ‘গগৈ-মগৈ’ বুলি এক মন্তব্য দি সমগ্ৰ গগৈ উপাধিধাৰীসকলৰ লগতে এক বিশেষ সম্প্ৰদায়ক তুচ্ছ জ্ঞান কৰিছে বুলি সৰ্বত্ৰে চৰ্চা হৈছে। আম আদমি পাৰ্টীয়ে অনুভৱ কৰোঁ যে মন্ত্ৰী ৰঞ্জিত দাসৰ এই মন্তব্য জঘন্য সাম্প্ৰদায়িক আৰু এটা সম্প্ৰদায়ক তুচ্ছ-তাচ্ছিল্য কৰাৰ চূড়ান্ত উদাহৰণ। সেয়ে আম আদমি পাৰ্টীয়ে দাবী

জনাইছোঁ যে এনে জঘন্য সাম্প্ৰদায়িক মন্তব্য কৰা মন্ত্ৰী ৰঞ্জিত দাসক বিজেপিয়ে দলৰ পৰা বহিষ্কাৰ কৰিব লাগে। আৰু বিধানসভাৰ অধ্যক্ষ বিশ্বজিৎ দৈমাৰীকো আমি অনুৰোধ জনাম যে ৰঞ্জিত দাসৰ তৎক্ষাণিকভাৱে বিধায়কৰ পদ খাৰিজ কৰিব লাগে। আমি সকলোৱে জানো যে ৰাহুল গান্ধীয়ে ‘মোদী’ উপাধিক সাঙুৰি কৰা এটা মন্তব্যৰ বাবে যোৱা মাৰ্চ মাহত ছুৰাটৰ এখন আদালতে তেওঁক দুবছৰৰ কাৰাদণ্ড বিহিছিল। এই ৰায়ৰ আলমতে লোকসভাৰ সচিবালয়ে ততাতৈয়াকৈ ৰাহুল গান্ধীৰ সাংসদ পদ খাৰিজ কৰিছিল। উপাধিক লৈ কৰা মন্তব্যত যদি ৰাহুল গান্ধীৰ সাংসদ পদ খাৰিজ হ’ব পাৰে, ৰঞ্জিত দাসৰ বিধায়কৰ পদ কিয় খাৰিজ কৰা নহ’ব?

তৃণমূল কংগ্ৰেছৰ অসমৰ সভাপতি ৰিপুণ বৰাইও ‘তিনি গগৈ’ক লৈ এক সাম্প্ৰদায়িক মন্তব্য কৰা আমাৰ চকুত পৰিছে। আম আদমি পাৰ্টীয়ে তৃণমূল কংগ্ৰেছৰ নেতৃত্বক দাবী জনাইছোঁ যাতে দলটোৰ নেতৃত্বঽই অসমৰ জনতাৰ প্ৰতি সন্মান জনাই এনে সাম্প্ৰদায়িক মন্তব্য কৰা ৰিপুণ বৰাক সাভাপতি পদৰ পৰা অপসাৰণ কৰে।বিজেপিৰ এজন বহুবল্কী বিধায়ক, যিজনক একমাত্ৰ বিতৰ্কিত কথা ক’বলৈ বহুৱাই থোৱা হৈছে, তেওঁ হ’ল ৰূপজ্যোতি কুৰ্মী। এইজন বিধায়কে পৱিত্ৰ হেংদাঙক লৈ যি ফটুৱামি কৰিলে, সেই কথা কোনো সংস্কৃতিৱান লোকে সহ্য কৰিব নোৱাৰে। তেওঁ আগে-পিছে এনে লাগ-বান নোহোৱা কথা কয় বাবেই তেওঁক ৰাইজে পুতৌ কৰি ক্ষমা কৰি দিব

নেকি? এনে সাম্প্ৰদায়িক মানসিকতাৰ লোক ৰাজনৈতিক ক্ষেত্ৰখনৰ কাৰণে বিষাক্ত সাপৰ দৰে। এই সাপ ৰাইজে পিঞ্জৰাবদ্ধ নকৰিলে অসমৰ ৰাজনৈতিক ক্ষেত্ৰখন সদায় বিষাক্ত হৈ থাকিব। আম আদমি পাৰ্টীয়ে দাবী জনাইছোঁ যাতে বিজেপিৰ নেতৃত্বই এনে সদস্যৰ জিভাত লেকাম লগাওক। অসমৰ ৰাজনীতি সাম্প্ৰদায়িকতামুক্ত কৰক বিজেপিয়ে। আজিৰ সংবাদমেলত উপস্থিত থাকে আপৰ ৰাজ্যিক সাংগঠনিক সম্পাদক ব্ৰজেন সন্দিকৈ, মুখপাত্ৰ হেমন্ত ফুকন আৰু হেপ্পী গগৈ।