গুৱাহাটীঃ কলাগুৰু বিষ্ণুপ্ৰসাদ ৰাভা, নটসূৰ্য ফণী শৰ্মা, বিশ্ববিশ্ৰুত শিল্পী ড° ভূপেন হাজৰিকা, জয়ন্ত হাজৰিকা আদিৰ স’তে অভিনয়, গীত পৰিৱেশন কৰা প্ৰথিতযশা গণশিল্পী বিক্ৰম সিং য়েইনৰ আজি ৪৫সংখ্যক মৃত্যু দিৱস তাল চছাইটি আৰু অসম লুতাদ (অসমীয়া, মিছিং ভাষাৰ সাপ্তাহিক কাকত)ৰ উদ্যোগত গুৱাহাটীৰ দৈনিক সোণৰ অসম কাকতৰ কাৰ্যলয়ত উদযাপন কৰে। প্ৰাককথনতে গণশিল্পী য়েইনৰ স্থিৰচিত্ৰত বন্তি প্ৰজ্বলন কৰি অসম সাহিত্য সভাৰ প্ৰাক্তন সহকাৰী সম্পাদক কমল কলিতাই কয়- ‘সৌ তাহানিতে গীতেৰে, কথাৰে অসমীয়া জাতিৰ হ’কে, সমন্বয়-সংহতিৰ বাবে গীত গাই, জাতিয় জীৱনৰ হ’কে অনেক চিন্তা উদ্বেগৰ কাম কৰি বিক্ৰম সিং য়েইনে
অনেক মচিব নোৱৰা সাঁচ বহুৱাই থৈ গৈছে৷’ ইয়াৰ পিছতে তাল সংগীত মহাবিদ্যালয় আৰু মলীউড ষ্টুডিঅ’ মুকলি কৰে ক্ৰমে অৱসৰপ্ৰাপ্ত প্ৰশাসনীয় বিষয়া কৃষ্ণৰাম মিলি আৰু অৱসৰপ্ৰাপ্ত সেনাৰ বিগ্ৰেডিয়াৰ অৱনী কুমাৰ পাইতে। তাল চছাইটিৰ অধ্যক্ষ ড° অৰিন্দম প্ৰিন্স পাংগিঙে সাৱলীল ধৰণেৰে আঁত ধৰা অনুষ্ঠানতে ‘অসম লুতাদ’ বঁটা প্ৰদান কৰে বিশিষ্ট কবি-গীতিকাৰ, সাহিত্যিক কৃষ্ণৰাম মিলিক৷ আনহাতে, বিক্ৰম সিং য়েইন বঁটা প্ৰদান কৰে জনপ্ৰিয় কন্ঠশিল্পী, অভিনেত্ৰী তৰুলতা কুটুমক৷ এই অনুষ্ঠানত বিশিষ্ট কবি দীপক শৰ্মা (ৰামপুৰ, দক্ষিণ কামৰূপ), পংকজ জন টায়ে ( বিশিষ্ট শিল্পী, জোনাই, ধেমাজী), কালিনাথ পাংগিং (সাহিত্যিক পেন্সনাৰ,
গোগামুখ ), লিলি দলে (গোগামুখ, লখিমপুৰ), ভানুমতী দলে (চিলাপথাৰ, ধেমাজী), জোনালী দলে (বিশিষ্ট দৌৰবিদ, গুৱাহাটী), অশ্বিনী পেগু (অৱসৰপ্ৰাপ্ত প্ৰশাসনীয় বিষয়া, লেখক, গুৱাহাটী), ড° মুনীন্দ্ৰ নাথ ঙাটে (প্ৰশাসনীয় বিষয়া), লক্ষী নন্দন পেগু (অভিনেতা, গুৱাহাটী), মুন চক্ৰৱৰ্তী (কবি, বৰাক উপত্যকা), কনক চন্দ্ৰ দলে (গুৱাহাট), ক বিশেষ ভাৱে সম্বৰ্দ্ধনা জ্ঞাপন কৰা হয়৷ সভাত ৰাষ্ট্ৰীয় ঘাইপথৰ লাইটৰ পোহৰত পঢ়ি লখিমপুৰৰ পূৱ তেলাহী হাইস্কুলৰ পৰা হাইস্কুল শিক্ষান্ত পৰীক্ষাত ৫টা বিষয়ত লেটাৰ লৈ ষ্টাৰ মাৰ্ক পোৱা ভাইটি দলেক পোন্ধৰ হেজাৰ টকা সহ সন্মান প্ৰদান কৰাৰ লগতে তাল চছাইটয়ে শিক্ষা জীৱন শেষ নোহোৱালৈ মাহে
জলপানি প্ৰদানৰ কথা ঘোষণা কৰে৷ অনুষ্ঠানত অনাতাঁৰ শিল্পী অৱনী কুমাৰ মিলি, লেখিকা চিত্ৰলেখা টায়ে, সমাজকৰ্মী বালিকা লাহনে বিশিষ্ট অতিথি হিচাপে অংশ লৈ তাল চছাইটি আৰু অসম লুতাদৰ প্ৰচেষ্টাক শলাগ লয়৷ অনুষ্ঠানত অৱসৰপ্ৰাপ্ত বিগ্ৰেডিয়াৰ অৱনী কুমাৰ মিলিয়ে কয়- সেনাত যোগদান কৰিলে মিছিং যুৱকক আৰ্থিক অনুদান দিয়াৰ কথা ঘোষণা কৰে৷ সভাত সনাতন পেগু, কে কে পাটগিৰি, ডেনিয়েল মিলি, ললিত পাংগিং, ধৰণী টাও প্ৰভৃতিয়ে গীত পৰিবেশন কৰি অনুষ্ঠানৰ সৌষ্ঠৱ বৰ্দ্ধন কৰে৷
