বকো সাহিত্য সভাৰ উদ্যোগতো বিষ্ণু ৰাভা দিৱসৰ প্ৰস্তুতি
বকোঃ সুন্দৰৰ পূজাৰী কলাগুৰু বিষ্ণুপ্ৰসাদ ৰাভাই সমাজ জীৱনৰ প্ৰতি আগবঢ়োৱা অৱদান আৰু কৃষ্টি সংস্কৃতিৰ বৰপীৰা স্থাপন কৰি যোৱা প্ৰয়াসক শলগ লৈ পালন কৰা হয় ৰাভা দিৱস। সমগ্ৰ ৰাজ্যৰ লগতে কামৰূপ জিলাৰ বকোতো ভিন্ন অনুস্থান প্ৰতিস্থানে পালন কৰে কলাগুৰু বিষ্ণুপ্ৰসাদ ৰাভাৰ বিষ্ণু ৰাভা দিৱস। সেই উপলক্ষে কামৰূপ জিলাৰ বকোৰ শাখাতিত শাখাতি সাংস্কৃতিক গোষ্ঠীৰ উদ্যোগত পালন কৰি অহা ৰাভা দিৱসে এই বেলি ২৫ বছৰীয়া হ’ল। শাখাতি সাংস্কৃতিক গোষ্ঠীৰ উদ্যোগত আয়োজন কৰা ৰাভা দিৱসৰ আজি ৰূপালী বৰ্ষ। শাখাতি সাংস্কৃতিক গোষ্ঠীৰ উদ্যোগত আয়োজন কৰা বিষ্ণু ৰাভা দিৱস উদযাপন সমিতিৰ সভাপতি পলাশ ডাকুৱা, উপ
সভাপতি ৰাজকুমাৰ শৰ্মা, সম্পাদকদ্বয় জয়ন্ত ৰাভা আৰু নিতুল কলিতাই জনোৱা মতে শাখাতি সাংস্কৃতিক গোষ্ঠীৰ উদ্যোগত এই বেলি কলাগুৰু বিষ্ণুপ্ৰসাদ ৰাভাৰ পবিত্ৰ স্মৃতি পালন কৰা ৰূপালী জয়ন্তী বৰ্ষ। এই ৰূপালী জয়ন্তী বৰ্ষৰ বাবে দুই দিনীয়াকৈ বিস্তৃত কাৰ্য্যক্ৰমণিকাৰে আয়োজন কৰা হৈছে বিষ্ণু ৰাভা দিৱস। ৰাভা দিৱসৰ ৰূপালী জয়ন্তী বৰ্ষৰ বিস্তৃত কাৰ্য্যসুচীৰ লগত সংগতি ৰাখি আয়োজন কৰা হৈছে মুকলি বিষ্ণু সংগীত প্ৰতিযোগিতা। উল্লেখ্য যে ৰূপালী জয়ন্তী বৰ্ষ হিচাপে আয়োজন কৰা ৰাভা দিৱসৰ ওপৰত পছিশ বছৰীয়া পৰিক্ৰমাৰ ইতিহাস সম্বলিত স্মৃতিগ্ৰন্থ উন্মোচন কৰা হ’ব। লগতে এক মনোজ্ঞ আলোচনা চক্ৰ আয়োজন কৰা হৈছে। অনুষ্ঠানত
চিত্ৰাংকন, কবিতা আবৃত্তিকে ধৰি ভিন্ন বৌদ্ধিক আৰু কৌশলী জ্ঞানৰ প্ৰতিযোগিতা আয়োজন কৰা হ’ব। ইফালে ৰাভা দিৱসৰ লগত সংগতি ৰাখি আয়োজন কৰা হৈছে বৰ্ণাঢ্য সাংস্কৃতিক সন্ধিয়াৰ। সাংস্কৃতিক সন্ধিয়াত অসমৰ বহু কেইজন খ্যাতনামা কণ্ঠশিল্পীৰ গীত মাত পৰিবেশন কৰা হ’ব। আনহাতে বকো সাহিত্য সভাৰ উদ্যোগতো সাহিত্য সভা ভৱনত পালন কৰা হ’ব বিষ্ণু ৰাভা দিৱসৰ কাৰ্য্যসুচী। এই কথা জানিব দিয়ে বকো সাহিত্য সভাৰ সভানেত্ৰী বিজয়া ডেকা আৰু সম্পাদক জনাৰ্দ্দন বড়োই।
