গুৱাহাটীঃ আগন্তুক লোকসভা নিৰ্বাচনত তৃতীয় পৰ্যায়ত অনুষ্ঠিত হ’বলগীয়া ভোটগ্ৰহণ প্ৰক্ৰিয়াৰ বাবে ৫ নং গুৱাহাটী লোকসভা সমষ্টিত আৰম্ভ হৈছে মনোনয়ন পত্ৰ দাখিল পৰ্ব। আজি কামৰূপ মহানগৰ জিলা নিৰ্বাচন বিষয়াৰ কাৰ্যালয়ত দুগৰাকী প্ৰাৰ্থীয়ে মনোনয়ন পত্ৰ দাখিল কৰে। ভাৰতীয় জাতীয় কংগ্ৰেছৰ ৫নং গুৱাহাটী লোকসভা সমষ্টিৰ প্ৰাৰ্থী মীৰা বৰঠাকুৰ গোস্বামীয়ে প্ৰথমে কামৰূপ মহানগৰ জিলাৰ ৰিটাৰ্ণিং বিষয়াৰ ওচৰত মনোনয়ন পত্ৰ দাখিল কৰে। তাৰ পাছত একম সনাতন ভাৰত দলৰ প্ৰাৰ্থী অমিতাভ শৰ্মাই মনোনয়ন পত্ৰ দাখিল কৰে। উল্লেখযোগ্য যে ৫ নং গুৱাহাটী লোকসভা সমষ্টিৰ বাবে মনোনয়ন পত্ৰ দাখিলৰ অন্তিম তাৰিখ ধাৰ্য কৰা হৈছে অহা ১৯ এপ্ৰিল। ২০ এপ্ৰিল তাৰিখে মনোনয়ন পত্ৰসমূহ পৰীক্ষা কৰা হ’ব আৰু মনোনয়ন পত্ৰ প্ৰত্যাহাৰৰ অন্তিম তাৰিখ ২২ এপ্ৰিল।
