কামৰূপ মহানগৰ নিৰ্বাচন জিলাত ভোটাৰৰ সুবিধাৰ্থে ভোটকেন্দ্ৰৰ স্থানান্তৰ, অতিৰিক্ত ভোটকেন্দ্ৰৰ সৃষ্টি

গুৱাহাটীঃ কামৰূপ মহানগৰ নিৰ্বাচন জিলা প্ৰশাসনে ভোটাৰৰ সুবিধাৰ্থে জৰাজীৰ্ণ হৈ পৰা ভোটকেন্দ্ৰৰ স্থানান্তৰ আৰু অতিৰিক্ত ভোটকেন্দ্ৰ সৃষ্টিৰ বাবে জনোৱা প্ৰস্তাৱত ভাৰতৰ নিৰ্বাচন আয়োগে অনুমোদন দিছে৷ নিৰ্বাচন বিষয়া শেখৰণ ফুকনে জনোৱা অনুসৰি ৩৪ নং ডিমৰীয়া বিধানসভা সমষ্টিৰ ৮৪ নং লোকপ্ৰিয় গোপীনাথ বৰদলৈ প্ৰেক্ষাগৃহৰ ভোটকেন্দ্ৰটোৰ স্থান সলাই ৮৪ নং চন্দ্ৰপুৰ জুনিয়ৰ বেচিক স্কুল ভোটকেন্দ্ৰ কৰা হৈছে৷ একেটা বিধানসভা সমষ্টিৰে ৯২ নং চন্দ্ৰপুৰ সাহিত্য সভা ভোটকেন্দ্ৰটোৰ স্থান সলাই ৯২ নং চন্দ্ৰপুৰ উচ্চ মধ্যমিক বিদ্যালয় ভোটকেন্দ্ৰ কৰা হৈছে৷ জৰাজীৰ্ণ হৈ পৰা বাবে

ভোটকেন্দ্ৰ দুটা নতুন ভৱনলৈ নিয়া হৈছে৷ আনহাতে ৩৩ নং দিছপুৰ বিধানসভা সমষ্টিৰ ২ নং মডাৰ্ন ইংলিছ স্কুল ভোটকেন্দ্ৰত এটা অতিৰিক্ত ভোটকেন্দ্ৰৰ সৃষ্টি কৰা হৈছে৷ একেটা বিধানসভা সমষ্টিৰে ৮২ নং নাৰবাম প্ৰাথমিক বিদ্যালয় ভোটকেন্দ্ৰত এটা অতিৰিক্ত ভোটকেন্দ্ৰৰ সৃষ্টি কৰা হৈছে৷ একেদৰে ৩৬ নং কেন্দ্ৰীয় গুৱাহাটী বিধানসভা সমষ্টিৰ ১৪৫ নং বেংগলী হাইস্কুল ভোটকেন্দ্ৰটোত এটা অতিৰিক্ত ভোটকেন্দ্ৰৰ সৃষ্টি কৰা হৈছে৷