মধুসুদন মেধি সভাপতি, অঞ্জন কুমাৰ শৰ্মা উপ-সভাপতি, মুকুট ৰাজ শৰ্মা সাধাৰণ সম্পাদক নিৰ্বাচিত
গুৱাহাটীঃ ৰাজ্যখনৰ সাংবাদিক, সংবাদকৰ্মী সকলৰ ন্যাযপ্ৰাপ্তিৰ হকে জন্মলগ্নৰে পৰা মাত মাতি অহা অসম বাৰ্তাজীৱী সংঘৰ সাংগঠনিক নিৰ্বাচন কালি গুৱাহাটী প্ৰেছ ক্লাবত অনুষ্ঠিত হৈ যায়। ৰাজ্যৰ অন্যতম শক্তিশালী তথা প্ৰধান সাংবাদিক সংগঠনটোৰ সাংগঠনিক নিৰ্বাচনত ২১খন জিলাৰ সাংবাদিকৰ লগতে গুৱাহাটীস্হ সংবাদ প্ৰতিস্থানৰ সাংবাদিক সকলে নিজৰ ভোটাধিকাৰ সাব্যস্ত কৰে। কালি পুৱা ৯ বজাৰ পৰা গুৱাহাটী প্ৰেছ ক্লাবত অনুষ্ঠিত নিৰ্বাচনৰ ফলাফল ঘোষণা কৰা হয় আজি পুৱা প্ৰায় ৪-৩০ বজাত। সংঘৰ ৬৪৮ গৰাকী সাংবাদিকে অংশগ্ৰহণ কৰা এই নিৰ্বাচনত সংঘৰ সভাপতি হিচাপে নিৰ্বাচিত হয় উত্তৰ গুৱাহাটীৰ জ্যেষ্ঠ সাংবাদিক মধুসুদন
মেধিয়ে৷ মেধিয়ে ৩৬৬ টা ভোট লাভ কৰাৰ বিপৰীতে প্ৰতিদ্বন্দী পূৰ্বৰ সভাপতি টুটুমণি ফুকনে লাভ কৰে ২৭১ টা ভোট।আনহাতে সংঘৰ উপ সভাপতি হিচাপে নিৰ্বাচিত হয় অসমীয়া প্ৰতিদিনৰ উপ সম্পাদক অঞ্জন কুমাৰ শৰ্মা। শৰ্মাই ৩৯৬ টা ভোট লাভ কৰাৰ বিপৰীতে প্ৰতিদ্বন্দী মণি মহন্তই লাভ কৰে ২৩৪ টা ভোট। আনহাতে একেৰাহে দ্বিতীয় বাৰৰ বাবে সংঘৰ সাধাৰণ সম্পাদক হিচাপে নিৰ্বাচিত হৈছ মুকুট ৰাজ শৰ্মা। শৰ্মাই ৪০৬ টা ভোট লাভ কৰাৰ বিপৰীতে প্ৰতিদ্বন্দী জগদীশ পাটগিৰিয়ে লাভ কৰে ২৪০ টা ভোট। এই নিৰ্বাচনত সংঘৰ কোষাধ্যক্ষ হিচাপে নৱনীতা কলিতা, সাংগঠনিক সম্পাদক হিচাপে বশিষ্ঠ দেৱ ফুকন, প্ৰচাৰ সম্পাদক পদত অখিল কলিতা, কাৰ্যালয়
সম্পাদক পদত হেমন্ত বৰ্মন আৰু সদস্য হিচাপে নিৰ্বাচিত হয় ক্ৰমে প্ৰদীপ বৰ্মন, ভাস্কৰ শৰ্মা, যতীন ভাগৱতী, ভূৱন চেতিয়া, অশ্বিনী কুমাৰ দুৱৰা, প্ৰশান্ত মোদক, তৰণী চৰণ কলিতা আৰু সোনাধৰ ডেকা। মুখ্য নিৰ্বাচনী বিষয়াতথা দৈনিক অসমৰ জ্যেষ্ঠ সহকাৰী সম্পাদক অতুল্য মাধৱ গোস্বামীৰ নেতৃত্বত সংঘৰ এই নিৰ্বাচন পৰিচলনা কৰে ক্ৰমে পংকজ কলিতা, সমীন্দ্ৰ ডেকা, হৰেকৃষ্ণ ডেকা, ৰণেন্দ্ৰ কুমাৰ গোস্বামী, হেমন্ত তামূলী, ধৰ্মেন্দ্ৰ তামূলী, পংকজ বৈশ্য, অংকুৰ জ্যোতি শৰ্মা আৰু তপন শৰ্মাই। অসম বাতাজিৱী সংঘৰ নতুন সমিতি খনক আদৰণি জনাইছে ভাৰতীয় বাৰ্তাজীৱী মহাসংঘৰ সভাপতি কে মল্লিকাৰ্জুন আৰু সম্পাদক প্ৰধান পৰমানন্দ পাণ্ডেই।
