ৰঙিয়া হৰদত্ত-বীৰদত্ত ফুটবলত সোনাপুৰ কে এম চি ছেমিফাইনেলত
ৰঙিয়াঃ ৰঙিয়া হৰদত্ত-বীৰদত্ত ক্ৰীড়া সংঘৰ উদ্যোগত ৰঙিয়া উচ্চতৰ মাধ্যমিক বিদ্যালয় খেলপথাৰত চলি থকা ষষ্ঠ বাৰ্ষিক চি এম চেম্পিয়নশ্বিপ ট্ৰফী আমন্ত্ৰণমূলক প্ৰাইজমানি ফুটবল প্ৰতিযোগিতাৰ আজি তৃতীয়খন কোৱাৰ্টাৰ ফাইনেলত সোনাপুৰ কেএমচিয়ে মুকালমুৱা আঞ্চলিক ক্ৰীড়া সন্থাক ২ —১ গ’লত পৰাজিত কৰি সোনাপুৰ দলটিয়ে ছেমিফাইনেলত প্ৰৱেশ কৰে। আজিৰ খেলখনৰ আৰম্ভণিতে ৰঙিয়াস্থিত স্পৰ্শ হস্পিটেলৰ জ্যেষ্ঠ চিকিৎসক ডাঃ ভৰত বৈশ্যই দুয়োটা দলৰ খেলুৱৈ সকলৰ সৈতে চিনাকি হৈ শুভ উদ্বোধন কৰে। খেলখন পৰিচালনা কৰে ৰেফাৰী ধ্ৰুৱজ্যোতি কলিতা, পহৰেদ আলী আহমেদ, দুলু তালুকদাৰ আৰু নিপন মেধিয়ে৷ কাইলৈ বেজেৰাত অনুষ্ঠিত হবলগীয়া চতুৰ্থ কোৱাৰ্টাৰ ফাইনেল খেলখনত এনএফ ৰেলৱে গুৱাহাটী আৰু গুৱাহাটী চিটি এফ চিয়ে তীব্ৰ প্ৰতিদ্বন্দিতা আগবঢ়াব।