ৰঙিয়া আৰক্ষীৰ জালত তিনি কুখ্যাত ড্ৰাগছ ব্যৱসায়ীঃ হে’ৰইন, অ’পিয়াম, পিষ্টল, মোবাইল, নগদ ধন, মটৰ চাইকেল সহ বহু নথিপত্ৰ জব্দ

ৰঙিয়াঃ অপৰাধৰ বিৰুদ্ধে সষ্টম হৈ আছে অসম আৰক্ষী। এনেক্ষেত্ৰত পিছ পৰি থকা নাই ৰঙিয়া আৰক্ষীও। ৰাজ্যৰ অন্য প্ৰান্তৰ সমান্তৰালকৈ ৰঙিয়া আৰক্ষীৰ জালত পৰিছে সঘনাই ইটোৰ পিছত-সিটোকৈ অপৰাধৰ লগত জড়িত থকা ব্যক্তি। এনে সময়তে আজি এক গোপন তথ্যৰ ভিত্তিত ৰঙিয়া আৰক্ষী থানাৰ ভাৰপ্ৰাপ্ত আৰক্ষী বিষয়া ভাস্কৰ মল্ল পাটোৱাৰীৰ নেতৃত্বত চলোৱা এক অভিযানত আটক হয় সন্দেহজনক অ’পিয়াম, হে’ৰইনসহ তিনিজনকৈ লোক। আটকাধীন লোককেইজন ক্ৰমে ৰঙিয়াৰ সমীপৱৰ্তী বালাগাঁৱৰ ৰাজীৱ আলী(২৭), ঘগ্ৰাপাৰ বৰকুকুৰীয়াৰ নুৰ ইছলাম আৰু ৰঙিয়া টাউনৰ ১নং ৱাৰ্ডৰ নাজিবুল হক ওৰফে ধন বুলি জানিবলৈ দিয়ে

আৰক্ষীয়ে। অভিযানকালত আৰক্ষীয়ে লোক কেইজনৰ পৰা ৯,১৯৩ কিলোগ্ৰাম সন্দেহজনক অপিয়াম, ৩৫ গ্ৰাম সন্দেহজনক হে’ৰইন, নগদ ধন ৩২,৫০০ টকা, নকল পিষ্টল এটা, মোবাইল ফোন ৫টা, এএছ ০১-ডি ডাব্লিউ-০৯১৭ নম্বৰৰ বুলেট এখনৰ লগতে বহু আপত্তিজনক নথিপত্ৰ জব্দ কৰিবলৈ সক্ষম হয়৷ উল্লেখ্য যে, দিনে-নিশাই আৰক্ষীয়ে ধাৰাবাহিকভাৱে অভিযান চলাই থকাৰ পিছতো আৰক্ষীৰ চকুত ধূলি দি একাংশই চলাই গৈছে মাৰাত্মক ড্ৰাগছৰ ৰমৰমীয়া বেহা। ইয়াকেই লৈ এতিয়া এক চিন্তনীয় বিষয় হৈ পৰিছে সমাজত। সম্প্ৰতি সন্দেহজনক ড্ৰাগছসহ আটক হোৱা তিনিওজন লোককে সোধা-পোচা কৰি অব্যাহত ৰাখিছে ৰঙিয়া আৰক্ষীয়ে তদন্ত।