ৰঙিয়াঃ ৰঙিয়া জিলা ক্ৰীড়া সন্থাৰ উদ্যোগত জয়ন্তীপুৰ যোগেশ্বৰ বিদ্যাপীঠ হাইস্কুল খেলপথাৰত চলি থকা স্বৰ্গীয় নিজৌমচা বড়ো সোৱৰণী ‘চুপাৰ ডিভিজন ফুটবল লীগ’ প্ৰতিযোগিতাৰ আজিৰ চুড়ান্ত খেলত ৰঙিয়া টাউন ক্লাৱ বনাম কলমনি মিলিজুলি যুৱক সংঘৰ মাজত অনুষ্ঠিত হয় ৷ অতি উত্তেজনাপূৰ্ণ খেলখনত ৰঙিয়া টাউন ক্লাবে কলমনি মিলিজুলি যুৱক সংঘক ২-০ গ’লৰ ব্যৱধানত পৰাস্ত কৰে। আজিৰ ফাইনেল খেলখনৰ প্ৰথমাৰ্ধত ৰঙিয়া টাউন ক্লাৱৰ ১১ নম্বৰ জাৰ্চি পৰিহিত খেলুৱৈ ৰাজীৱ বড়োয়ে দিয়া ১-০ গ’লৰ ব্যৱধানত টাউন ক্লাৱ আগবাঢ়ি আছিল। আনহাতে দ্বিতীয়াৰ্দ্ধত পুনৰ ৰঙিয়া টাউন ক্লাবৰ ১৭ নম্বৰ জাৰ্চি পৰিহিত খেলুৱৈ অক্ষয়
মুছাহাৰীয়ে দিয়া দ্বিতীয়টো গ’লৰ সহায়ত ৰঙিয়া টাউন ক্লাৱে চেম্পিয়নশ্বিপ খিতাপ অৰ্জন কৰিবলৈ সক্ষম হয়। প্ৰতিযোগিতাৰ শ্ৰেষ্ঠ খেলুৱৈ বঁটা কলমনি মিলিজুলি যুৱক সংঘৰ ৰণজিত বড়ো, চূড়ান্ত খেলৰ শ্ৰেষ্ঠ খেলুৱৈ বঁটা ৰঙিয়া টাউন ক্লাৱৰ তুষাৰঞ্জন বড়ো আৰু শ্ৰেষ্ঠ গলৰক্ষকৰ বটা লাভ কৰে ৰঙিয়া টাউন ক্লাৱৰ গলৰক্ষক দীপ বড়োয়ে। আজিৰ খেলখন পৰিচালনা কৰে ৰেফাৰী এআইএফএফৰ ইলাইট ৰেফাৰী চৈয়দ জেহৰুল ইছলাম, এএফএ ৰেফাৰী ধ্ৰুৱজ্যোতি কলিতা, আনচাৰ উদ্দিন আহমেদ আৰু চতুৰ্থ অফিচিয়েল পহৰেদ আলী আহমেদে। চুড়ান্ত খেলত আমন্ত্ৰিত অতিথি হিচাবে উপস্থিত থাকে ৰাজ্যসভাৰ সাংসদ ভূৱনেশ্বৰ কলিতা,
অসম ফুটবল সন্থাৰ উপ সভাপতি তথা জিলা ক্ৰীড়া সন্থাৰ সাধাৰন সম্পাদক মুকুতানন্দ ভট্টাচার্য্য, ৰঙিয়া মহকুমাৰ মহকুমাধিপতি তথা অতিৰিক্ত উপায়ুক্ত দিপন বৰ্মন, ৰঙিয়া সদৰ থানাৰ ভাৰপ্ৰাপ্ত আৰক্ষী বিষয়া ভাস্কৰ মল্ল পাটোৱাৰী প্ৰমুখ্যে জিলা ক্ৰীড়া সন্থাৰ বিষয়ববীয়া সকল।
