গুৱাহাটীঃ বিশিষ্ট সমাজকৰ্মী, বাওঁপন্থী নেতা তথা গণতান্ত্ৰিক অধিকাৰৰ হকে আজীৱন সংগ্ৰাম অব্যাহত ৰখা শ্ৰদ্ধাৰ অৱনী বৰঠাকুৰৰ বিয়োগত শোক প্ৰকাশ কৰিছে কৃষক মুক্তি সংগ্ৰাম সমিতিয়ে। এক শোকবাৰ্তাত কৃষক মুক্তিৰ সভাপতি ৰাজু বৰা, দেৱেন শৰ্মা, সাধাৰণ সম্পাদক বিদ্যুৎ শইকীয়া আৰু বিতু সোণোৱালে প্ৰয়াত অৱনী বৰঠাকুৰৰ মৃত্যুত কৃষক মুক্তিৰ পৰিয়লবৰ্গ অতি মৰ্মাহত হোৱাৰ কথা প্ৰকাশ কৰে। সংগঠনটোৰ নেতৃত্বই কয় যে, প্ৰয়াত বৰঠাকুৰ হৈছে আজীৱন সমাজবাদী আদর্শ প্ৰতিষ্ঠাৰ হকে সৰ্বোচ্চ ত্যাগ কৰা এগৰাকী স্বনামধন্য ব্যক্তিত্ত্ব। তেখেতৰ মৃত্যু অসমৰ সমাজ জীৱনৰ বাবে এক অপুৰণীয় ক্ষতি। আমি বিশ্বাস কৰোঁ প্ৰয়াত বৰঠাকুৰৰ আপোচবিহীন স্থিতি আৰু সংগ্ৰামী চেতনাই নৱ প্ৰজন্মৰ বাবে অনুপ্ৰেৰণা আৰু চিৰপাঠেয় হৈ ৰ’ব। প্ৰয়াত অৱনী বৰঠাকুৰৰ প্ৰতি গভীৰ শ্ৰদ্ধাঞ্জলি জ্ঞাপন কৰাৰ লগতে অধিবক্তা পুত্ৰ শান্তনু বৰঠাকুৰ সহিতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিলোঁ।
