কাজলগাঁওঃ চিৰাং জিলাৰ অন্যতম ব্যৱসায়িক অঞ্চল ঢালিগাঁও বজাৰত কালি পুৱতি নিশা এক ভয়াবহ অগ্নিকাণ্ডৰ ঘটনা সংঘটিত হয়। পুৱতি নিশা প্ৰায় ৩ বজাত সংঘটিত এই অগ্নিকাণ্ডত তিনিখন দোকান সম্পূৰ্ণৰূপে পুৰি ভস্মীভূত হোৱাৰ উপৰিও আন দুখন দোকান ক্ষতিগ্ৰস্ত হয়। ভস্মীভূত তিনিখন দোকানৰ ভিতৰত এখন কিতাপৰ দোকান আৰু আনদুখন ষ্টেচনাৰী তথা অন্যান্য সামগ্ৰীৰ দোকান। অগ্নিকাণ্ডৰ ঘটনা সম্পৰ্কে পুৱা প্ৰায় ৪ বজাতহে স্বত্বাধিকাৰীসকলে খবৰ লাভ কৰে। পিছত পাঁচখনকৈ অগ্নিনিৰ্বাপক বাহিনীৰ গাড়ী আহি
ৰাইজৰ সহায়ত প্ৰায় দুঘণ্টাৰ অন্তত অগ্নি নিৰ্বাপন কৰে। ইপিনে পুৰি ছাই হোৱা মনোৰমা বুক হাউচৰ স্বত্বাধিকাৰীয়ে জানিবলৈ দিয়া মতে দোকানত জমা থকা নগদ ৭৫ হাজাৰ টকা সহ ২৫ লক্ষাধিক টকাৰ কিতাপ আৰু অন্যান্য সামগ্ৰী এই অগ্নিকাণ্ডত পুৰি ছাই হৈ যায়।আন দুখন দোকানৰো ২০ লাখৰো অধিককৈ টকাৰ সামগ্ৰী ভস্মীভূত হয় বুলি সদৰি কৰে স্বত্বাধিকাৰীয়ে। অগ্নিকাণ্ডৰ সঠিক কাৰণ জানিব পৰা হোৱা নাই।
