গ্ৰাহকলৈ আগবঢ়োৱা ই-গভৰ্নেন্স সেৱাৰ স্বীকৃতি
গুৱাহাটীঃ গুৱাহাটী জল ব’ৰ্ড নামেৰে পৰিচিত গুৱাহাটী মহানগৰ খোৱাপানী আৰু অনাময় পৰিষদলৈ হায়দৰাবাদস্থিত ভাৰতৰ প্ৰশাসনীয় পদাধিকাৰী মহাবিদ্যালয়ৰ ৰাজহুৱা ব্যৱস্থাত উদ্ভাৱন কেন্দ্ৰই তথ্য প্ৰযুক্তি শাখাত বিশেষ বঁটা আগবঢ়াইছে৷ ‘ৱেব নিৰ্ভৰ পানী যোগান সংযোগ পঞ্জীয়ন আৰু ধন আদায় ব্যৱস্থা’ৰ জৰিয়তে গুৱাহাটী জল ব’ৰ্ডে কৰা উদ্ভাৱনীমূলক পদক্ষেপৰ বাবে এই বঁটা আগবঢ়োৱা হৈছে৷ প্ৰতিষ্ঠানখনৰ সঞ্চালক প্ৰধান ড° নিৰ্মাল্য বাগছীয়ে গুৱাহাটী
জল ব’ৰ্ডৰ পৰিচালন সঞ্চালক পল্লৱ গোপাল ঝা, সচিব পঞ্চমী চৌধুৰী আৰু বিশেষ কৰ্তব্যৰত বিষয়া অনুৰাগ ৰুদ্ৰলৈ প্ৰেৰণ কৰা এখন পত্ৰযোগে বঁটা আগবঢ়োৱাৰ কথা সদৰি কৰে৷ উল্লেখ্য যে ই-গভৰ্নেন্সৰ দিশত লোৱা একেটা পদক্ষেপৰ বাবে গুৱাহাটী জল ব’ৰ্ডে মৰ্যাদাপূৰ্ণ স্ক’চ বঁটাও লাভ কৰিবলৈ সক্ষম হৈছে৷
