গুৱাহাটীঃ লোকসভা নিৰ্বাচনৰ দিন চমু চাপি অহাৰ লগে লগে ৰাজনৈতিক দলসমূহৰ মাজত ইতিমধ্যে তৎপৰতা বৃদ্ধি পাইছে৷ বিশেষকৈ বিজেপি বিৰোধী দলসমূহৰ উমৈহতীয়া মঞ্চ ‘ইণ্ডিয়া’ গঠন হোৱাৰ পিছত তৃণমূল কংগ্ৰেছৰ ৰাজনৈতিক ব্যস্ততা পৰিলক্ষিত হৈছে ৷ সমগ্ৰ দেশৰ লগতে অসমতো নিৰ্বাচনকেন্দ্ৰিক এই তৎপৰতা বাঢ়িছে ৷ অসমত বিৰোধী ৰাজনৈতিক দলসমূহৰ উমৈহতীয়া কুচকাৱাজৰ সমান্তৰালভাৱে তৃণমূল কংগ্ৰেছৰ সৰ্বভাৰতীয় সাধাৰণ সম্পাদক অভিষেক বেণাৰ্জীয়ে অসম তৃণমূল কংগ্ৰেছৰ সভাপতি ৰিপুণ বৰাক কাইলৈ কলকাতালৈ জৰুৰীভাৱে মাতি পঠিয়াইছে৷
তৃণমূল কংগ্ৰেছৰ নেতা অভিষেক বেণাৰ্জীৰ আমন্ত্ৰণক্ৰমে ৰিপুণ বৰা আজি সন্ধিয়া কলকাতালৈ ৰাওনা হব ৷ অসমত তৃণমূল কংগ্ৰেছৰ সাংগঠনিক সক্ৰিয়তাৰ পিছত কাইলৈ হবলগীয়া এই নিৰ্বাচনকেন্দ্ৰিক আলোচনা অত্যন্ত গুৰুত্বপূৰ্ণ হিচাপে বিবেচিত হৈছে ৷ এই আলোচনাতে অসমত তৃণমূল কংগ্ৰেছ দলে কিমানখন লোকসভাৰ আসন বিচাৰিব সেই সম্পৰ্কেও আলোচনা হব৷
