আমবাৰীত অগপ মহিলা পৰিষদৰ সাধাৰণ সভা সম্পন্ন
গুৱাহাটীঃ অসম গণ পৰিষদ দলৰ ভগ্নী সংগঠন অসম মহিলা পৰিষদ কেন্দ্ৰীয় সমিতিৰ এখনি সাধাৰণ সভা আজি দলৰ আমবাৰীস্থ মুখ্য কাৰ্য্যালয়ত সভানেত্ৰী বৰদা কলিতাৰ সভাপতিত্বত অনুষ্ঠিত হয়। ৰাজ্যখনৰ বিভিন্ন জিলা আৰু সমষ্টিৰ পৰা পাচঁ শতাধিক মহিলা প্ৰতিনিধি উপস্থিত থকা এই সভাত উপস্থিত থাকি দলটোৰ সভাপতি তথা মন্ত্ৰী অতুল বৰাই ৰাজ্যখনৰ উন্নয়ণ আৰু বিকাশৰ মহিলাসকলৰ আগ্ৰণী ভূমিকাৰ কথা উল্লেখ কৰি অসমৰ জাতীয় জীৱন মহিলাসকলৰ অৱদানক স্মৰণ কৰে। সভাপতি বৰাই লগতে কয় যে, মহিলাসকলৰ সামাজিক ন্যায় ওপৰত গুৰুত্ব প্ৰদান কৰি মহিলাসকলক সৰ্বস্তৰতে সৱলীকৰণৰ ওপৰত মতপোষণ কৰে। সভাত
দলটোৰ কাৰ্য্যকৰী সভাপতি তথা মন্ত্ৰী কেশৱ মহন্তই মহিলাসকলৰ স্থান আমাৰ সমাজত সদায় উচ্চ আৰু মহিলাসকলৰ দায়বদ্ধতাই সমাজৰ বাবে সদায় সাহসৰ প্ৰতীক হিচাপে বিবেচিত হৈ আহিছে। মহিলাসকলৰ ত্যাগ আৰু কৰ্মোদ্যমেই হৈছে অসম গণ পৰিষদ দলৰ অন্যতম চালিকা শক্তি। সভাত দলৰ সাধাৰণ সম্পাদক ৰমেন্দ্ৰ নাৰায়ণ কলিতা, মনোজ শইকীয়া, ভূপেন ৰায়, পোনাকন বৰুৱা, উপ-সভাপতি সুনীল ডেকা, সুনীল ৰাজকোৱঁৰ আদি উপস্থিত থাকে। এই সভাতেই পূৰৱী তালুকদাৰক সভানেত্ৰী, বন্তী পাঠক আৰু প্ৰণিতা গগৈক কাৰ্য্যকৰী সভানেত্ৰী, ১৪ গৰাকী সভানেত্ৰীসহ মুঠ ৫১ জনীয়া অসম মহিলা পৰিষদৰ কেন্দ্ৰীয় সমিতিখন গঠন কৰা হয়। এই সভাতেই প্ৰাক্তন সভানেত্ৰী বৰদা কলিতা আৰু কাৰ্য্যকৰী সভানেত্ৰী মামনী বৰাক অসম গণ পৰিষদ দলৰ কেন্দ্ৰীয় সমিতিৰ সম্পাদিকা হিচাপে সভাপতি অতুল বৰাই মনোনীত কৰে।
