ৰঙিয়াঃ ৰঙিয়া জিলা ক্ৰীড়া সন্থাৰ উদ্যোগত জয়ন্তীপুৰ যোগেশ্বৰ বিদ্যাপীঠ হাইস্কুল খেলপথাৰত চলি থকা ৰঙিয়া ‘বি ডিভিজন ফুটবল লীগ’ প্ৰতিযোগিতাৰ আজিৰ দ্বিতীয় ছেমিফাইনেলত কেতেকীবাৰী জ্ঞানদা সংঘই ২ – ১ গ’লৰ ব্যৱধানত পীতাম্বৰৰ বাৰদৈ ক্লাৱক পৰাজিত কৰি ফাইনেলত প্ৰৱেশ কৰে। দুয়োটা দলৰ সুন্দৰ খেল প্ৰদৰ্শনত ফুটবল খেলপ্ৰেমী ৰাইজে যথেষ্ট আমোদ লাভ কৰে। আমন্ত্ৰিত অতিথি হিচাবে উপস্থিত থাকি দ্বিতীয়াৰ্ধত দুয়োটা দলৰ লগত চা-চিনাকী হৈ খেলপ্ৰেমী ৰাইজৰ আগত সাৰুৱা বক্তব্য দাঙি ধৰে ৰঙিয়া ৰাজহ চক্ৰৰ চক্ৰ বিষয়া ভাস্কৰজ্যোতি কলিতাই। আজিৰ খেলখন পৰিচালনা কৰে ৰেফাৰী ধ্ৰুৱজ্যোতি কলিতা, বাহাৰুল ইছলাম, নিপন বড়ো আৰু পহৰেদ আলী আহমেদে। ৫ আগষ্টৰ চুড়ান্ত খেলত বাইহাটা চাৰিআলিৰ প্ৰক্ষালন ক্লাৱে কেতেকীবাৰী জ্ঞানদা সংঘৰ বিৰুদ্ধে তীব্ৰ প্ৰতিদ্বন্দিতা আগবঢ়াব৷
