ৰঙিয়াঃ ৰঙিয়া জিলা ক্ৰীড়া সন্থাৰ উদ্যোগত জয়ন্তীপুৰ যোগেশ্বৰ বিদ্যাপীঠ হাইস্কুল খেলপথাৰত চলি থকা ৰঙিয়া ‘বি ডিভিজন ফুটবল লীগ’ প্ৰতিযোগিতাৰ আজিৰ এখন উত্তেজনাপূৰ্ণ লীগখেলত কেতেকীবাৰী জ্ঞানদা সংঘই ৰঙিয়া এন এফ ৰেলৱে এফ চিক ৩ -০ গ’লত পৰাজিত কৰি লীগৰ সম্পূৰ্ণ পইন্ট অৰ্জন কৰে।কেতেকীবাৰী জ্ঞানদা সংঘৰ হৈ প্ৰথমাৰ্ধৰ ৫ মিনিটত, আৰু ১৮ মিনিটত ১০ নম্বৰ জাৰ্চি পৰিহিত মোস্তাফা আহমেদ আৰু ২৮ মিনিটত ৰাহুল আহমেদে গ’ল দিয়াৰ বিপৰীতে দলটিৰ ১০ নম্বৰ জাৰ্চি পৰিহিত খেলুৱৈ মোস্তাফা আহমেদক প্ৰথমাৰ্ধৰ ২১ মিনিটত ৰেফাৰীয়ে হালধীয়া কাৰ্ড দেখুৱাই । আনহাতে ৰঙিয়া এন এফ ৰেলৱে এফ চিৰ ১০ নম্বৰ জাৰ্চি পৰিহিত নেৰচন বড়োক দ্বিতীয়াৰ্ধৰ ৪০ মিনিটত হালধীয়া কাৰ্ড দেখুৱাই। আজিৰ খেলখন পৰিচালনা কৰে ৰেফাৰী জয়ন্ত মাধৱ দাস, বাহাৰুল ইছলাম, সতীশ ডেকা আৰু পহৰেদ আলী আহমেদে৷ কাইলৈ আন এখন লীগ খেলত ৰঙিয়া চানলাইট ক্লাৱে বাইহাটা চাৰিআলিৰ প্ৰক্ষালন ক্লাৱৰ বিৰুদ্ধে প্ৰতিদ্বন্দিতা আগবঢ়াব৷
